Канон пресвятой богородице пред ея иконой «владимирская»




Скачать 63.05 Kb.
Дата12.06.2016
Размер63.05 Kb.

КАНОН ПРЕСВЯТОЙ БОГОРОДИЦЕ ПРЕД ЕЯ

ИКОНОЙ «ВЛАДИМИРСКАЯ»


Память празднуем 21 мая (3 июня)

Тропарь, глас 4-й


Днесь светло красуется славнейший град Москва, яко зарю солнечную, восприемши, Владычице, чудотворную Твою икону, к нейже ныне мы притекающе и молящеся Тебе, взываем сице: о пречудная Владычице Богородице! Молися из Тебе воплощенному Христу Богу нашему, да избавит град сей и вся грады и страны христианския невредимы от всех навет вражиих и спасет души наша, яко Милосерд.

КАНОН, ГЛАС 4-й

Песнь 1


Ирмос: Отверзу уста моя, и наполнятся Духа, и слово отрыгну Царице Матери, и явлюся, светло торжествуя, и воспою, радуяся, Тоя чудеса.

Припев: Пресвятая Богородице, спаси нас.

Просвети, Владычице, души наша зарею Божественною, паче ума благодатию Твоею, и независтный дар подаждь ми воспети Тя, яко Помощницу человеческому существу, Препетая, верное заступление, на враги победу отечеству нашему.



Пресвятая Богородице, спаси нас.

Приидите, соберитеся, российстии собори, в пречестный храм Всенепорочныя Владычицы и возопийте, умильно молящеся, к честному образу взирающе: Богородице Безневестная, хвалящия Тя спаси.



Слава: Твой, Богомати, всечестный образ Богогласный Евангелия Христова списатель, пребожественный Лука, написав, Творца всех на Твоих честных руках вообрази, к немуже притекающия напасти и печали избавляеши и вся покрываеши Твоею милостию.

И ныне: Храм прекрасный, Содетель всех едину Тя обрет, в Тя вселися и человеки обожи. К Немуже за ны, Богородице, молися, спасти ны от поганых пленения и всякия иныя скорби, находящия на ны, да Твоего днесь образа сретение всечестно празднуем.

Песнь 3


Ирмос: Твоя песнословцы, Богородице, Живый и Независтный Источниче, лик себе совокупльшия, духовно утверди, в Божественней Твоей славе венцев славы сподоби.

Пресвятая Богородице, спаси нас.

Все помышление отвергше, Богомудрии, приидите в сретение прекрасныя зари, держащия пресветлую лучу, вся просвещающую и милостию весь мир обогащшую.



Пресвятая Богородице, спаси нас.

Твою, Богомати, всечестную и чудотворную икону российстии люди стяжавше, яко заступление крепко и стену нерушиму, молятся Ти, на враги победу даровати отечеству нашему.



Слава: Облак светозарный показася, росою благодати вся омывающи телесныя скверны и души просвещающи, едина Всепетая.

И ныне: Древо многоплодно явилася еси, пищею негиблющею вся насыщающи, души же веселящи, Богоневесто Чистая, добродеяния всем источи и от скорбей нуждных спаси.
Господи, помилуй (трижды). Слава, и ныне:

Седален, глас 4-й


Народи Боголюбивии, приидите в сретение: се бо приходит Дева, всех пророков превышши, честным Своим образом, Жизнодателя миру на руках имеющи, град Свой сохраняти страждущий, варварскую дерзость низложити, вообразитися всем Хранительница тверда, держава и ограждение верно молящимся.

Песнь 4


Ирмос: Неизследный Божий Совет, еже от Девы, воплощения Тебе, Вышняго, пророк Аввакум усмотряя, зовяше: слава силе Твоей, Господи.

Пресвятая Богородице, спаси нас.

Гору превелию, юже Даниил виде, от неяже камень отсечеся без руки и вся соблазны истни, верныя же просвети, истинное светозарное солнце показа, лучами просвещающи, Богородице Приснодево.



Пресвятая Богородице, спаси нас.

Вооружаются на люди Твоя, Чистая Богородице, сынове Агарины, злый совет творяще, грады разоряюще, верныя же погубляюще, но Ты, Всепетая, Твоею милостию вся низложи, исмаильтяны враги покаряющи отечеству нашему.



Слава: Небо одушевлено, едина Богомати, Свет велий приемши, вся просвещающи, тьму держащих бед разжени и нас Вышняго причастия сподоби.

И ныне: Давид пред кивотом ликовствует, левити же воспевают паче же пред Тобою, Богородительнице Чистая, Россия хвалами яко Царицу воспевает, гласы молебными прилежно Ти вопиющи: радуйся, Заступнице града нашего.

Песнь 5


Ирмос: Ужасошася всяческая о Божественней славе Твоей: Ты бо, Неискусобрачная Дево, имела еси во утробе над всеми Бога и родила еси Безлетнаго Сына, всем воспевающим Тя мир подавающая.

Пресвятая Богородице, спаси нас.

Тебе, Богомати, великий во пророцех Исаия провиде Духом, Угль имеющу во чреве, верныя просвещающ и соблазны вся пожигающ, спасая род человеч.



Пресвятая Богородице, спаси нас.

Жезл Ааронов прозябла еси и злобный корень исторгнула еси, Дево Богоневестная, Жизнодателя рождши миру, Егоже моли сему граду спастися от многих напастей.



Слава: Ныне убо приступите с веселием, Богоизбранное стадо, российстии собори, ко Всечестней Божии Матери и честный Ея образ любезно приимите: се бо благодать неисчерпаемая, воды точащи Божественныя неоскудно, Юже, вернии, почтим и честному образу Ея поклонимся.

И ныне: От корене Иессеева древо возрасте всем животное, Плод убо прозябла еси во утробе Твоей, Дево Чистая, вся люди насыщающи Твоею милостию.

Песнь 6


Ирмос: Божественное сие и Всечестное совершающе празднество, Богомудрии, Богоматере, приидите, руками восплещим, от Нея рождшагося Бога славим.

Пресвятая Богородице, спаси нас.

От Тебе, Богомати, истече поток сладкий, вся напаяя люди, душ измывая скверны, Богородице Владычице, спаси всех, покланяющихся верно честному образу Твоему.



Пресвятая Богородице, спаси нас.

Вси убо, совокупльшеся вкупе, воспоем Чистую Деву, Богоизбранную лествицу Иаковлю, Гедеоново же руно, радости Ходатаицу, крепость и похвалу спасаемых, Богородительницу Чистую.



Слава: Се ныне веселие приближается, скорбь же потребляется, вернии спасаются, яко от источника радость почерпающе, вину хвалами воспевают: радуйся, Чистая Владычице, спасения нашего начаток и всех верных стена и похвала.

И ныне: Подаждь нам помощь мольбами Твоими, Пречистая Богородице, скорби убо находят на ны и печали умножаются, врази ополчаются, но Ты, Пречистая, представши, избави, врагов наших шатание низложи, на враги победу даруй, да посрамятся вси, являющия рабом Твоим злая.
Господи, помилуй (трижды). Слава, и ныне:

Кондак, глас 8-й


Взбранной Воеводе победительная, яко избавльшеся от злых пришествием Твоего честнаго образа, Владычице Богородице, светло сотворяем празднество сретения Твоего и обычно зовем Ти: радуйся, Невесто Неневестная.

Икос


Ангел Предстатель с Небесе послан бысть рещи Богородице: радуйся, и, со безплотным гласом воплощаема Тя зря, Господи, ужасашеся, и стояше, зовый к Ней таковая: радуйся, Еюже радость возсияет; радуйся, Еюже клятва исчезнет. Радуйся, падшаго Адама воззвание; радуйся, слез Евиных избавление. Радуйся, высото, неудобовосходимая человеческими помыслы; радуйся, глубино неудобозримая и ангельскима очима. Радуйся, яко еси Царево седалище; радуйся, яко носиши Носящаго вся. Радуйся, звездо, являющая солнце; радуйся, утробо Божественнаго воплощения. Радуйся, Еюже обновляется тварь; радуйся, Еюже покланяемся Творцу. Радуйся, Невесто Неневестная.

Песнь 7


Ирмос: Не послужиша твари Богомудрии паче Создавшаго, но, огненное прещение мужески поправше, радовахуся, поюще: препетый отцев Господь и Бог, благословен еси.

Пресвятая Богородице, спаси нас.

Яко порфирою и виссом, червленою хламидою, Дево Богородице Владычице, град Твой Тобою одеявся, Христа величает и пришествие честнаго Твоего образа славит, явльшася паче луч солнечных и немрачным светом просвещающа велегласно хвалящия Тя.



Пресвятая Богородице, спаси нас.

Скрижали, Богописанныя перстом Духа, в ярости Моисей сокруши; но в Тебе, Чистая, преславный Творец вселився, невредну Тя сохрани. Емуже поем: отец наших Боже, благословен еси.



Слава: Приими Твоих раб мольбы, Пречистая Дево Богородице, непостоянную бурю утиши молитвами Твоими и советы противных врагов разжени, нападающих на стадо Твое, Всенепорочная Владычице.

И ныне: Тебе едину помощницу роду человеческому, Богородице Марие, Зиждитель всех Рождеством Своим назнамена и пророцы прообразиша: ов Тя дверь, ин же Тя ложницу Божию; мы же Тя воспеваем Родительницу Божию, и Ходатаицу к Богу, и Заступницу от всех зол, находящих на ны.

Песнь 8


Ирмос: Отроки благочестивыя в пещи Рождество Богородичо спасло есть; тогда убо образуемое, ныне же действуемое, вселенную всю воздвизает пети Тебе: Господа пойте, дела, и превозносите Его во вся веки.

Пресвятая Богородице, спаси нас.

Како Тя, Дево, по достоянию воспоем? Помощь твердую, Хранительницу жизни нашея и Ходатаицу непреложну к Сыну Твоему и Богу нашему, Егоже воспеваем и превозносим во веки.



Пресвятая Богородице, спаси нас.

Цвете прекрасный и воня пищная, облагоухаеши, Богородице Марие, вся, и спасаеши, и от недуг исцеляеши, бесы прогоняеши. Темже Ти вопием: радуйся, Помощнице всем молящимся верным.



Слава: Столп явльшися, Богомати, нахождения противных отгоня: Тя бо чтущим сердцем теплым явилася еси стено, ограждение, и спасительное прибежище.

И ныне: Давидски воспеваем Ти песнь, гору Божию Тя именующе, Пречистая Дево: Источника бо сущим приснотекущаго источила еси. Егоже поем и превозносим во веки.

Песнь 9


Ирмос: Всяк земнородный да взыграется, Духом просвещаемь, да торжествует же Безплотных умов естество, почитающее священное торжество Богоматере, и да вопиет: радуйся, Всеблаженная Богородице, Чистая Приснодево.

Пресвятая Богородице, спаси нас.

Радости Ходатаице, возвесели наш смысл вопити Тебе, Богородице Чистая: радуйся, Хранительнице наша, державо, и ограждение, и спасительное прибежище.



Пресвятая Богородице, спаси нас.

Да восхвалят согласно Тя небо и земля, яко Жизнодателя миру рождши: радуйся, тихое пристанище, животныя воды источниче неисчерпаемый, Владычице.



Слава: Собравшеся днесь, людие, во сретение Пречистыя Божия Матере, Яже винограда мысленнаго грозд носящи, вино источающ всегда и веселия всех исполняющ, яко Богородицу по долгу славим.

И ныне: Божественная река вод животных, вся удолия напояющи, наша соблазны, Богомати, погрузи и до конца потреби.






База данных защищена авторским правом ©uverenniy.ru 2016
обратиться к администрации

    Главная страница