Ирмосы воскресного канона, глас 1




Скачать 242.53 Kb.
Дата19.07.2016
Размер242.53 Kb.

Ирмосы воскресного канона, глас 1


1. Твоя победительная десница боголепно в крепости прославися: та бо, Безсмертне, яко всемогущая, противныя сотре, Израильтяном путь глубины новосоделавшая.

3. Едине ведый человеческаго существа немощь и милостивно в не воображся, препояши мя с высоты силою, еже вопити Тебе, Святый: одушевленный храме неизреченныя славы Твоея, Человеколюбче.

4. Гору Тя благодатию Божиею приосененную прозорливыма Аввакум усмотрив очима, из Тебе изыти Израилеву провозглашаше Святому, во спасение наше и обновление.

5. Просветивый сиянием пришествия Твоего, Христе, и освятивый Крестом Твоим мира концы, сердца просвети светом Твоего Богоразумия, православно поющих Тя.

6. Обыде нас последняя бездна, несть избавляяй, вменихомся яко овцы заколения, спаси люди Твоя, Боже наш: Ты бо крепость немощствующих и исправление.

Кондак: Воскресл еси яко Бог из гроба во славе, и мир совоскресил еси, и естество человеческое яко Бога воспевает Тя, и смерть исчезе: Адам же ликует, Владыко, Ева ныне от уз избавляема радуется зовущи: Ты еси, Иже всем подая, Христе, воскресение.

7. Тебе умную, Богородице, пещь разсмотряем, вернии; якоже бо отроки спасе три, Превозносимый, мир обнови во чреве Твоем всецел, хвальный отцев Бог и препрославлен.

8. В пещи отроцы Израилевы, якоже в горниле добротою благочестия чистее злата блещахуся, глаголюще: благословите, вся дела Господня, Господа, пойте и превозносите во вся веки.

9. Образ чистаго рождества Твоего, огнепалимая купина показа неопальная; и ныне на нас напастей свирепеющую угасити молимся пещь, да Тя, Богородице, непрестанно величаем.

1. Во глубине постла иногда фараонитское всевоинство пре­оруженная сила; воплощшееся же Слово всезлобный грех потребило есть, препрославленный Господь, славно бо прославися.

3. Процвела есть пустыня, яко крин, Господи, языческая неплодящая церковь, пришествием Твоим, в ней же утвердися мое сердце.

4. Пришел еси от Девы, не ходатай, ни Ангел, но Сам, Господи, воплощься, и спасл еси всего мя, человека. Тем зову Ти: слава силе Твоей, Господи.

5. Ходатай Богу и человеком был еси, Христе Боже; Тобою бо, Владыко, к Светоначальнику Отцу Твоему от нощи неведения приведение имамы.

6. В бездне греховней валяяся, неизследную милосердия Твоего призываю бездну: от тли, Боже, мя возведи.

Кондак: Воскресл еси от гроба, Всесильне Спасе, и ад, видев чудо, ужасеся, и мертвии восташа. Тварь же видящи срадуется Тебе и Адам свеселится, и мир, Спасе мой, воспевает Тя присно.

7. Богопротивное веление беззаконнующаго мучителя высок пламень вознесло есть; Христос же простре Богочестивым отроком росу духовную, Сый благословен и препрославлен.

8. Пещь иногда огненная в Вавилоне действа разделяше, Божиим велением халдеи опаляющая, верныя же орошающая, поющыя: благословите, вся дела Господня, Господа.

9. Безначальна Родителя Сын Бог и Господь, воплощься от Девы нам явися, омраченная просветити, собрати расточенная, тем Всепетую Богородицу величаем.

1. Воды древле, манием Божественным, во едино сонмище совокупивый и разделивый море Израильтеским людем. Сей Бог наш препрославлен есть. Тому Единому поим, яко прославися.

3. Иже от несущих вся приведый, Словом созидаемая, совершаемая Духом, Вседержителю Вышний, в любви Твоей утверди мене.

4. Положил еси к нам твердую любовь, Господи, Единороднаго бо Твоего Сына за ны на смерть дал еси. Темже Ти зовем благодаряще: слава силе Твоей, Господи!

5. К Тебе утреннюю всех Творцу, преимущему всяк ум мирови, зане свет повеления Твоя, в нихже настави мя.

6. Бездна последняя грехов обыде мя, и исчезает дух мой; но прострый, Владыко, высокую Твою мышцу, яко Петра, мя, Управителю, спаси.

Кондак: Воскресл еси днесь из гроба, Щедре, и нас возвел еси от врат смертных. Днесь Адам ликует, и радуется Ева, вкупе же и пророцы с патриархи воспевают непрестанно Божественную державу власти Твоея.

7. Якоже древле благочестивыя три отроки оросил еси в пламени халдейстем, светлым Божества огнем и нас озари, благословен еси, взывающыя, Боже отец наших.

8. Нестерпимому огню соединившеся, Богочестия предстояще юноши, пламенем же невреждени, Божественную песнь пояху: благословите, вся дела Господня, Господа и превозносите во вся веки.

9. Новое чудо и Боголепное! Девическую бо дверь затворенную яве проходит Господь, наг во входе, и плотоносец явися во исходе Бог, и пребывает дверь затворена. Сию неизреченно яко Богоматерь величаем.

1. Моря чермную пучину невлажными стопами древний пешешествовав Израиль, крестообразныма Моисеовыма рукама Амаликову силу в пустыни победил есть.

3. Веселится о Тебе Церковь Твоя, Христе, зовущи: Ты моя крепость. Господи, и прибежище и утверждение.

4. Вознесена Тя видевши Церковь на Кресте, Солнце праведное, ста в чине своем, достойно взывающи: слава силе Твоей, Господи.

5. Ты, Господи мой, Свет в мир пришел еси, Свет Святый, обращаяй из мрачна неведения, верою воспевающыя Тя.

6. Пожру Ти со гласом хваления. Господи, Церковь вопиет Ти, от бесовский крове очищшися, ради милости от ребр Твоих истекшею Кровию.

Кондак: Спас и Избавитель мой, из гроба яко Бог воскреси от уз земнородныя, и врата адова сокруши, и яко Владыка воскресе тридневен.

7. В пещи Авраамстии отроцы персидстей, любовию благочестия паче, нежели пламенем опаляеми, взываху: благословен еси в храме славы Твоея, Господи.

8. Руце распростер Даниил, львов зияния в рове затче, огненную же силу угасиша, добродетелию препоясавшеся, благочестия рачителие отроцы, взывающе: благословите, вся дела Господня, Господа.

9. Камень нерукосечный от несекомыя горы Тебе, Дево, краеугольный отсечеся, Христос, совокупивый разстоящаяся естества. Тем веселящеся Тя, Богородице, величаем.

1. Коня и всадника в море чермное, сокрушаяй брани мышцею высокою, Христос истрясе, - Израиля же спасе, победную песнь поюща.

3. Водрузивый на ничесомже землю повелением Твоим и повесивый неодержимо тяготеющую, на недвижимом, Христе, камене заповедей Твоих Церковь Твою утверди, Едине Блаже и Человеколюбче.

4. Божественное Твое разумев истощание прозорливо Аввакум, Христе, со трепетом вопияше Тебе: во спасение людей Твоих спасти помазанныя Твоя пришел еси.

5. Одеяйся светом, яко ризою, к Тебе утреннюю и Тебе зову: душу мою просвети омраченную, Христе, яко Един Благоутробен.

6. Неистовствующееся бурею душетленною, Владыко Христе, страстей море укроти и от тли возведи мя, яко Благоутробен.

Кондак: Ко аду, Спасе мой, сошел еси, и врата сокрушивый яко Всесилен, умерших яко Создатель совоскресил еси, и смерти жало сокрушил еси, и Адам от клятвы избавлен бысть, Человеколюбче. Темже вси зовем: спаси нас, Господи!

7. Превозносимый отцев Господь пламень угаси, отроки ороси, согласно поющыя: Боже, благословен Еси.

8. Тебе, Вседетелю, в пещи отроцы, всемирный лик сплетше, пояху: дела всякая, Господа пойте и превозносите во вся веки.

9. Исаие, ликуй! Дева име во чреве и роди Сына Еммануила, Бога же и Человека, Восток имя Ему: Его же величающе, Деву ублажаем.

1. Яко по суху пешешествовав Израиль по бездне стопами, гонителя фараона, видя потопляема. Богу победную песнь поим, вопияше.

3. Несть свят, якоже Ты, Господи Боже мой, вознесый рог верных Твоих, Блаже, и утвердивый нас на камени исповедания Твоего.

4. Христос моя сила, Бог и Господь, честная Церковь боголепно поет взывающи, от смысла чиста о Господе празднующи.

5. Божиим светом Твоим, Блаже, утреннюющих Ти душы любовию озари, молюся, Тя ведети, Слове Божий, истиннаго Бога, от мрака греховнаго взывающа.

6. Житейское море воздвизаемое зря напастей бурею, к тихому пристанищу Твоему притек вопию Ти: возведи от тли живот мой, Многомилостиве.

Кондак: Живоначальною дланию умершыя от мрачных удолий, Жизнодавец воскресив всех, Христос Бог воскресение подаде человеческому роду: есть бо всех Спаситель, Воскресение и Живот и Бог всех.

7. Росодательну убо пещь содела Ангел преподобным отроком, халдеи же опаляющее веление Божие мучителя увеща вопити: благословен еси Боже отец наших.

8. Из пламене преподобным росу источил еси, и праведнаго жертву водою попалил еси: вся бо твориши, Христе, токмо еже хотети. Тя превозносим во вся веки.

9. Бога человеком невозможно видети, на Него же не смеют чини Ангельстии взирати: Тобою бо, Всечистая, явися человеком Слово воплощенно. Его же величающе, с небесными вои Тя ублажаем.

1. Манием Твоим на земный образ преложися прежде удоборазливаемое водное естество, Господи; темже немокренно пешешествовав Израиль, поет Тебе песнь победную.

3. В начале небеса всесильным словом Твоим утверждей, Господи Спасе, и вседетельным и Божиим Духом, всю силу их, на недвижимем мя камени исповедания Твоего утверди.

4. Отча недра не оставль и сошед на землю, Христе Боже, тайну услышах смотрения Твоего, и прославих Тя, едине Человеколюбче.

5. Нощь несветла неверным, Христе, верным же просвещение в сладости словес Твоих: сего ради к Тебе утренюю, и воспеваю Твое Божество.

6. Плавающаго в молве житейских попечений с кораблем потопляема грехи, и душетленному зверю приметаема, яко Иона, Христе, вопию Ти: из смертоносныя глубины возведи мя.

Кондак: Не ктому держава смертная возможет держати человеки: Христос бо сниде, сокрушая и разоряя силы ея. Связуемь бывает ад, пророцы согласно радуются; предста, глаголюще. Спас сущим в вере, изыдите, вернии, в воскресение.

7. Пещь отроцы огнепальну древле росоточащу показаша, Единаго Бога воспевающе, и глаголюще: пре-возносимый отцев Бог, и препрославлен.



8. Неопальная огню в Синаи причащшаяся купина Бога яви медленоязычному и гугнивому Моисеови, и отроки ревность Божия три непреборимыя во огни певцы показа: вся дела Господня Господа пойте и превозносите во вся веки.

9. Нетления искушением рождшая, всехитрецу Слову плоть взаимодавшая, Мати неискусомужная, Дево Богородице: Приятелище Нестерпимаго, Село Невместимаго Зиждителя Твоего, Тя величаем.

1. Колесницегонителя фараоня погрузи, чудотворяй иногда Моисейский жезл, крестообразно поразив и разделив море,- Израиля же, беглеца-пешеходца, спасе, песнь Богови воспевающа.

3. Утверждей в начале небеса разумом и землю на водах основавый, на камени мя, Христе, заповедей Твоих утверди, яко несть свят, паче Тебе, Едине Человеколюбче.

4. Ты моя крепость, Господи, Ты моя и сила, Ты мой Бог, Ты мое радование, не оставль недра Отча и нашу нищету посетив. Тем с пророком Аввакумом зову Ти; силе Твоей слава, Человеколюбче.

5. Вскую мя отринул еси от лица Твоего, Свете незаходимый, и покрыла мя есть чуждая тма окаяннаго? но обрати мя и к свету заповедей Твоих пути моя направи, молюся.

6. Очисти мя, Спасе, многа бо беззакония моя, и из глубины зол возведи, молюся: к Тебе бо возопих, и услыши мя, Боже спасения моего.

Кондак: Воскрес из гроба, умершия воздвигл еси и Адама воскресил еси, и Ева ликует во Твоем воскресении, и мирстии концы торжествуют, еже из мертвых возстанием Твоим, Многомилостиве.

7. Божия снизхождения огнь устыдеся в Вавилоне иногда; сего ради отроцы в пещи радованною ногою, яко во цветнице, ликующе пояху: благословен еси, Боже отец наших.

8. Седмерицею пещь халдейский мучитель Богочестивым неистовно разжже, силою же лучшею спасены сия видев, Творцу и Избавителю вопияше: отроцы, благословите, священницы, воспойте, людие, превозносите во вся веки.

9. Ужасеся о сем небо, и земли удивишася концы, яко Бог явися человеком плотски, и чрево Твое бысть пространнейшее небес. Тем Тя, Богородицу, Ангелов и человек чиноначалия величают.

1. Отверзу уста моя,/ и наполнятся духа,/ и слово отрыгну Царице Матери,/ и явлюся светло торжествуя,/ и воспою радуяся Тоя Чудеса.

3. Твоя песнословцы, Богородице,/ живый и независтный источниче,/ лик себе совокупльшия духовно утверди/ в Божественней Твоей славе,/ венцев славы сподоби.

4. Седяй в славе/ на престоле Божества,/ во облаце легце,/ прииде Иисус пребожественный,/ нетленною дланию, и спасе зовущия: / слава, Христе, силе Твоей.

5. Ужасошася всяческая/ о Божественней славе Твоей;/ Ты бо, неискусобрачная Дево,/ имела еси во утробе над всеми Бога,/ и родила еси безлетнаго Сына,/ всем воспевающим Тя/ мир подавающая.

6. Божественное сие и всечестное/ совершающе празднество,/ богомудрии, Богоматере,/ приидите руками восплещим,/ от Нея рождшагося Бога славим.



7. Не послужиша твари богомудрии/ паче Создавшаго,/ но огненное прещение мужески поправше,/ радовахуся поюще:/ препетый отцев Господь и Бог, благословен еси.

Перед катавасией, поем: Хвалим, благословим, покланяемся Господеви, поюще и превозносяще во вся веки.



8. Отроки благочестивыя в пещи/ рождество Богородичо спасло есть:/ тогда убо образуемое,/ ныне же действуемое,/ вселенную всю воздвизает пети Тебе:/ Господа пойте дела,/ и превозносите Его во вся веки.

9. Всяк земнородный/ да взыграется, духом просвещаемь,/ да торжествует же безплотных умов естество,/ почитающее священное торжество Богоматере,/ и да вопиет:/ радуйся, Всеблаженная,/ Богородице чистая Приснодево.



1. Крест начертав Моисей, впрямо жезлом Чермное пресече, Израилю пешеходящу, тоже обратно фараоновым колесницам, ударив совокупи, вопреки написав непобедимое оружие. Тем Христу поим Богу нашему, яко прославися.

3. Жезл во образ тайны приемлется, прозябением бо предразсуждает священ-ника: неплодящей же прежде Церкви, ныне процвете, древо Креста, в державу и утверждение.

4. Услышах, Господи, смотрения Твоего таинство, разумех дела Твоя и прославих Твое Божество.

5. О, треблаженное древо, на немже распяся Христос Царь и Господь, имже паде древом прельстивый тобою прельстився, Богу пригвоздившуся плотию, подающему мир душам нашим.

6. Воднаго зверя во утробе длани Иона крестовидно распростер, спасительную страсть проображаше яве. Тем тридневен изшед, премирное воскресение прописаше, плотию пригвожденнаго Христа Бога, и тридневным воскресением мир просвещшаго.

7. Безумное веление мучителя злочестиваго люди поколеба, дышущее прещение и злохуление богомерзкое: обаче три отроки не устраши ярость зверская, ни огнь снедаяй, но противодышущу росоносному Духу, со огнем суще пояху: Препетый отцев и нас, Боже, благословен еси.

8. Благословите, отроцы, Троицы равночисленнии, Содетеля Отца Бога, пойте снизшедшее Слово, и огнь в росу претворшее, и превозносите всем жизнь Подавающаго, Духа Всесвятаго, во веки.

1-й припев Праздника: Величай, душе моя, Пречестный Крест Господень.

2-й припев Праздника: Величай, душе моя, Животворящего Креста Господня воздвижение.

9. Таин еси Богородице рай, невозделанно возрастивший Христа, Имже крестное живоносное на земли насадися древо, тем ныне возносиму, покланяющеся Ему, Тя величаем.

1. Отверзу уста моя,/ и наполнятся духа,/ и слово отрыгну Царице Матери,/ и явлюся светло торжествуя,/ и воспою радуяся Тоя вхождение.

3. Твоя песнословцы, Богородице,/ живый и независтный источниче,/ лик себе совокупльшия духовно утверди/ в честном вхождении Твоем/ венцев славы сподоби.

4. Неизследный Божий совет,/ еже от Девы воплощения,/ Тебе Вышняго,/ пророк Аввакум усмотряя, зовяше:/ слава силе Твоей, Господи.

5. Ужасошася всяческая/ в честнем вхождении Твоем./ Ты бо, неискусобрачная Дево,/ внутрь вошла еси в храм Божий,/ якоже чистейший храм,/ всем воспевающим Тя/ мир подавающая.

6. Божественное сие и всечестное/ совершающе празднество,/ богомудрии, Богоматере,/ приидите руками восплещим,/ от Нея рождшагося Бога славим.

7. Не послужиша твари богомудрии/ паче Создавшаго,/ но огненное прещение мужески поправше,/ радовахуся поюще:/ препетый отцев Господь и Бог, благословен еси.

8. Слыши, Отроковице Дево Чистая,/ да речет убо Гавриил/ Совет Вышняго древний истинный:/ буди к приятию готова Божию, Тобою бо Невместимый с человеки поживе./ Тем и радуюся вопию:/ благословите вся дела Господня Господа.

1-й припев Праздника: Ангели вхождение Пречистыя зряще удивишася:/ како Дева вниде во святая святых.

9. Яко одушевленному Божию Кивоту, да никакоже коснется рука скверных. Устне же верных Богородице немолчно глас ангела воспевающе с радостию да вопиют: истинно вышши всех еси, Дево Чистая.

1. Ангели вхождение Пречистыя зряще удивишася:/ како Дева вниде во святая святых.

2. Ангели вхождение Всечистыя зряще удивишася:/ како со славою вниде во святая святых.

3. Ангели вхождение Девы зряще удивишася:/ како преславно вниде во святая святых.

4. Ангели и человецы, Девы вхождение почтим:/ яко со славою вниде во святая святых.

5. Ангели вхождение Девы зряще удивишася:/ како богоугодне вниде во святая святых.

6. Ангели, взыграйте со святыми, девы, сликовствуйте:/ Богоотроковица бо вниде во святая святых.

7. Ангели и человецы Деву песньми да возвеличим:/ боголепно бо вниде во святая святых.

8. Величай, душе моя,/ приведенную во храм Господень,/ и благословенную руками иереевыми.

9. Величай, душе моя,/ Триипостаснаго и Нераздельнаго Божества Державу.

10. Величай, душе моя,/ честнейшую и славнейшую горних воинств/ Деву Пречистую Богородицу.

1. Спасе люди чудодействуяй Владыка, мокрую моря волну оземленив древле: волею же рождься от Девы, стезю проходну небесе полагает нам, Егоже по существу, равна же Отцу и человеком славим.

3. Призри на пения рабов Благодетелю, врага смиряя вознесенную гордыню: носяй же, Всевидче, греха превыше непоколеблемо, утвержденныя, Блаже, певцы основанием веры.

4. Рода человеча обновление, древле поя пророк Аввакум предвозвещает, видети неизреченно сподобився образ: младый Младенец бо из горы Девы изыде, людей во обновление Слово.

5. Из нощи дел омраченныя прелести, очищение нам Христе, бодренно ныне совершающим песнь яко благодетелю, прииди, подаваяй удобну стезю, по нейже востекающе, обрящем славу.

6. Обитая Иона в преисподних морских, приити моляшеся и бурю утолити: унзен же аз мучащаго стрелою, Христу воспеваю, зол губителю, скоро приити Тебе к моей лености.

7. Всецаря любовию уловленнии, отроцы укориша безчисленно ярящася мучителя злобожное языковредие: имже повинуся огнь многий Владыце глаголющим: во веки благословен еси.

8. Утробу неопально образуют Отроковицы, иже в Ветсем опаляеми юноши, преестественно раждающую, запечатленну: обоя же содевающи чудодейство едино, люди к пению возставляет благодать.
1-й припев Праздника: Величай душе моя, честнейшую и славнейшую горних воинств, Деву Пречистую Богородицу.

1-й канон: 9. Таинство странное вижу и преславное: небо, вертеп: престол херувимский, Деву: ясли, вместилище, в нихже возлеже Невместимый Христос Бог, Егоже воспевающе величаем.

Припевы:

Днесь Дева раждает Владыку внутрь вертепа.

Днесь Владыка раждается яко младенец от Матере Девы.

2-й канон: 9. Любити убо нам, яко безбедное страхом удобее молчание, любовию же Дево песни ткати спротяженно сложенныя, неудобно есть: но и Мати силу, елико есть произволение, даждь.

1. Христос раждается, славите: Христос с небес, срящите: Христос на земли, возноситеся. Пойте Господеви, вся земля, и веселием воспойте, людие, яко прославися.

3. Прежде век от Отца рожденному нетленно Сыну, и в последняя от Девы воплощенному безсеменно, Христу Богу возопиим: вознесый рог наш, свят еси, Господи.

4. Жезл из корене Иессеова и цвет от него, Христе, от Девы прозябл еси, из горы Хвальный, приосененныя чащи пришел еси, воплощься от Не-искусомужныя, Невещественный и Боже. Слава силе Твоей, Господи.

5. Бог сый мира, Отец щедрот, великаго совета Твоего Ангела, мир подавающа, послал еси нам. Тем богоразумия к свету наставльшеся, от нощи утренююще, славословим Тя, Человеколюбче.

6. Из утробы Иону младенца изблева морский зверь, якова прият; в Деву же всельшееся Слово и плоть приемшее, пройде сохраньшее нетленную. Егоже бо не пострада истления, Рождшую сохрани неврежденну.

7. Отроцы благочестию совоспитани, злочестиваго веления небрегше, огненнаго прещения не убояшася, но посреде пламене стояще пояху: отцев Боже, благословен еси.

8. Чуда преестественнаго росо-дательная изобрази пещь образ: не бо яже прият палит юныя, яко ниже огнь Божества Девы, в Нюже вниде, утробу. Тем воспевающе воспоем: да бла-гословит тварь вся Господа и пре-возносит во вся веки.

1-й припев Праздника: Величай душе моя, честнейшую и славнейшую горних воинств, Деву Пречистую Богородицу.

9. Таинство странное вижу и пре-славное: небо, вертеп: престол херувимский, Деву: ясли, вместилище, в нихже возлеже Невместимый Христос Бог, Егоже воспевающе величаем.

1. Глубины открыл есть дно, и сушею своя влечет, в ней покрыв противныя, крепкий во бранех Господь, яко прославися.

3. Крепость даяй царем нашим Господь, и рог помазанных Своих возносяй, от Девы раждается, грядет же ко крещению. Тому вернии возопиим: несть свят яко Бог наш.

4. Услышах, Господи, глас Твой, егоже рекл еси, глас вопиющаго в пустыни, яко возгремел еси над водами многими, Твоему свидетельствуяй Сыну, весь быв сошедшаго Духа, возопи: Ты еси Христос, Божия мудрость и сила.

5. Иисус живота начальник, разрешити осуждение грядет Адама первозданнаго, очищений же яко Бог не требуя, падшаго очищает во Иордане: в немже вражду убив, преимущ всяк ум мир дарует.

6. Глас словесе, светильник света, денница солнца, Предтеча, в пустыни покайтеся всем вопиет людем и предъочиститеся: се бо предстоит Христос, от тли мир избавляяй.

7. Юноши благочестивыя, пещи огненней приобщившияся, шумящ дух росный невредимы сохрани, и Божия ангела снизхождение. Темже в пламени орошаеми, благодарственно воспеваху: препетый отцев Господи и Боже благословен еси.

8. Тайну преславную вавилонская показа пещь, источившая росу, яко струями имяше невещественный огнь восприяти Иордан, и объяти плотию крещаема Зиждителя: Егоже благословят людие, и превозносят во вся веки.

1-й припев Праздника: Величай, душе моя, Честнейшую горних воинств Деву Пречистую Богородицу.

9. Недоумеет всяк язык благохвалити по достоянию, изумевает же ум и премирный пети Тя, Богородице; обаче Благая сущи, веру приими, ибо любовь веси божественную нашу: Ты бо христиан еси Предстательница, Тя величаем.

1. Сушу глубородительную землю солнце нашествова иногда, яко стена бо огусте обаполы вода, людем пешемореходящим, и богоугодно поющим: поим Господеви, славно бо прославися.

3. Утверждение на Тя надеющихся, утверди, Господи, Церковь, юже стяжал еси честною Твоею кровию.

4. Покрыла есть небеса добродетель Твоя, Христе, из кивота бо прошед святыни Твоея нетленныя Матере, в храме славы Твоея явился еси, яко Младенец руконосимь и исполнишася вся Твоего хваления.

5. Яко виде Исаиа образно на престоле превознесена Бога, от ангел славы дориносима, о, окаянный, вопияше, аз: провидех бо воплощаема Бога, Света невечерня, и миром владычествующа.

6. Возопи к Тебе видев старец очима спасение, еже людем прииде от Бога: Христе, Ты Бог мой.

7. Тебе во огни оросившаго отроки богословившия, и в Деву нетленну всельшагося, Бога Слово поим, благочестно поюще: благословен Бог отец наших.

8. Нестерпимому огню соединившеся, богочестия предстояще юноши, пламенем же невреждени, Божественную песнь пояху: благословите вся дела Господня Господа, и превозносите во вся веки.

9. В законе сени и писаний образ видим вернии: всяк мужеский пол, ложесна разверзая, свят Богу. Тем Перворожденное Слово Отца Безначальна, Сына Первородящася Материю неискусомужно, величаем.

6. Возопи прообразуя погребение тридневное пророк Иона, в ките моляся: от тли избави мя, Иисусе, Царю сил.

7. Не послужиша твари богомудрии/ паче Создавшаго,/ но огненное прещение мужески поправше,/ радовахуся поюще:/ препетый отцев Господь и Бог, благословен еси.

8. Слыши отроковице, Дево чистая, да речет убо Гавриил совет Вышняго древний истинный: буди к приятию готова Божию, Тобою бо Невместимый с человеки поживе. Тем и радуяся вопию: благословите вся дела Господня Господа.

9. Яко одушевленному Божию кивоту, да никакоже коснется рука скверных. Устне же верных Богородице немолчно глас Ангела воспевающе, с радостию да вопиют: радуйся, Благодатная, Господь с Тобою.

1. Явишася источницы бездны, влаги непричастны, и открышася моря волнующася основания бурею: манием бо запретил еси ему, изрядныя же люди спасл еси, поющия победную песнь,Тебе, Господи.

3. Точащий краесекомый повелением Твоим, твердый ссаша камень Израильтестии людие. Камень же Ты еси, Христе, и жизнь, на немже утвердися Церковь, зовущая: осанна, благословен еси Грядый.

4. Христос, грядый явственно Бог наш, приидет и не закоснит, от горы приосененныя чащи, Отроковицы раждающия неискусомужныя, пророк древле глаголет. Тем вси вопием: слава силе Твоей, Господи.

5. На гору Сион взыди благовествуяй, и Иерусалиму проповедуяй, в крепости вознести глас: преславная глаголашася о тебе граде Божий, мир на Израиля, и спасение языком.

6. Возопиша с веселием праведных дуси: ныне миру завет новый завещается, и кроплением да обновятся людие, Божия крове.

7. Спасый во огни авраамския Твоя отроки, и халдеи убив, яже правда праведно уловляше, препетый Господи Боже отец наших, благословен еси.

8. Веселися, Иерусалиме, торжествуйте любящии Сиона: царствуяй бо во веки Господь сил прииде, да благоговеет вся земля от Лица Его, и да вопиет: Благословите вся дела Господня Господа.

9. Бог Господь, и явися нам, составите праздник, и веселящеся приидите, возвеличим Христа, с ваиами и ветвьми песньми зовуще: благословен Грядый во имя Господа Спаса нашего.

1. Спасителю Богу в мори люди немокрыми ногами наставльшему и фараона со всевоинством потопльшему, Тому Единому поим, яко прославися.

3. Силою Креста Твоего, Христе, утверди мое помышление, во еже пети и славити спасительное Твое вознесение.

4. Услышах слух силы Креста, яко рай отверзеся им, и возопих: слава силе Твоей, Господи.

5. Утренююще вопием Ти, Господи, спаси ны: Ты бо еси Бог наш, разве бо Тебе иного не знаем.

6. Обыде мя бездна, гроб мне кит бысть, аз же возопих к Тебе Человеколюбцу, и спасе мя десница Твоя, Господи.

7. В пещи огненней песнословцы спасый отроки, благословен Бог отец наших.

8. Из Отца прежде век рожденнаго Сына и Бога, и в последняя лета воплощеннаго от Девы Матере, священницы пойте, людие превозносите во вся веки.

1-й припев Праздника: Величай, душе моя, вознесшагося от земли на небо Христа Жизнодавца.

9. Тя паче ума и словесе Матерь Божию, в лето Безлетнаго неизреченно рождшую, вернии единомудренно величаем.

1. Божественным покровен медленно-язычный мраком, извитийствова Богописанный закон: тину бо оттряс очесе умнаго, видит Сущаго и научается Духа разуму, хваля божественными песньми.

3. Разверзе утробы, нечадствовавшия узы, досаду же неудоботерпиму благо-чадствующия, едина молитва пророчицы древле Анны, носящия дух сокрушен, к Сильному и Богу разумов.

4. Царю царей, яковый от яковаго Един, Слове, произшедый от Отца безвиновнаго, равномощнаго Твоего Духа апостолом истинно послал еси, яко Благодетеля, поющим: слава державе Твоей, Господи.

5. Решительное очищение грехов, огнедухновенную приимите Духа росу, о чада светообразная церковная; Ныне от Сиона бо изыде закон, языкоогнеобразная Духа благодать.

6. Очищение нам, Христе, и спасение, Владыко, возсиял еси от Девы, да яко пророка от зверя морскаго персей Иону, от тли исхитиши всего Адама всеродна падшаго.

7. Согласная возшуме органская песнь, почитати златосотворенный бездушный истукан; Утешителева же светоносная благодать почествует, еже вопити: Троице Единая, равносильная, Безначальная, благословена еси.

8. Разрешает узы и орошает пламень трисветлый Богоначалия образ, поют отроцы, благословит же Единаго Спаса и Вседетеля, яко Благодетеля, сотворенная всяческая тварь.

9. Радуйся, Царице, матеродевственная славо: всяка бо удобообращательная благоглаголивая уста витийствовати не могут Тебе пети достойно: изумевает же ум всяк Твое Рождество разумети. Темже Тя согласно славим.

1. Понтом покры фараона с колес-ницами, сокрушаяй брани мышцею высокою, поим Ему, яко прославися.

3. С высоты силою, учеником Христе, дондеже облецетеся, рекл еси, седите во Иерусалиме: Аз же яко Мене, Утешителя иного, Духа Моего же и Отча послю, в Немже утвердитеся.

4. Смотряяй пророк в последняя Твое, Христе, пришествие, вопияше: Твою услышах, Господи, силу, яко вся спасти помазанныя Твоя пришел еси.

5. Страха ради Твоего зачатый, Господи, во чреве пророков, и рожденный на земли Дух спасения, апостольская сердца созидает чиста, и в верных правый обновляется: свет бо и мир зане Твоя повеления.

6. Плавающаго в молве житейских попечений, с кораблем потопляема грехи, и душетленному зверю приметаема, яко Иона, Христе, вопию Ти: из смертоносныя глубины возведи мя.

7. В пещь огненную ввержени преподобнии отроцы, огнь в росу преложиша, воспеванием сице вопиюще: Благословен еси, Господи, Боже отец наших.

8. Неопальная огню, в Синаи причащ-шаяся купина, Бога яви медленноязычному и гугнивому Моисеови, и отроки ревность Божия три непреборимыя во огни певцы показа; вся дела Господня Господа пойте, и превозносите во вся веки.

9. Не тления искушением рождшая, и Всехитрецу Слову плоть взаимо-давшая, Мати неискусомужная Дево Богородице, приятелище нестерпимаго, село невместимаго 3иждителя Твоего, Тя величаем.

1. Лицы Израильтестии, невлажными стопами понт Чермный и влажную глубину прогнавше, всадники тристаты враги видяще в ней погружены, с ве-селием пояху: поим Богу нашему, яко прославися.

3. Лук сильных изнеможе, и немо-щствующии препоясашася силою: сего ради утвердися в Господе сердце мое.

4. Услышах славное смотрение Твое, Христе Боже, яко родился еси от Девы, да от лести избавиши зовущия: слава силе Твоей Господи.

5. От света пресекий первородный свет, яко во свете дела поют Тя, Христе, Содетеля, во свете Твоем пути наша направи.

6. Внегда скорбети ми, возопих ко Господу, и услыша мя Бог спасения моего.

7. Авраамстии иногда в Вавилоне отроцы пещный пламень попраша, песньми взывающе: отец наших Боже, благословен еси.

8. В Вавилоне отроцы, божественною распаляеми ревностию, мучителя и пламене прещение мужески попраша и посреде огня ввержени, орошаеми пояху: благословите, вся дела Господня, Господа.

Припев: Величай, душе моя, на Фаворе преобразившегося Господа.
9. Рождество Твое нетленно явися: Бог из боку Твоею пройде, яко Плотоносец явися на земли и с человеки поживе; Тя, Богородице, тем вси величаем.

1. Преукрашенная Божественною славою, священная и славная, Дево, память Твоя вся собра к веселию верныя, начичнающей Мариаме с лики и тимпаны Твоему поющия Единородному: славно яко прославися.

3. Содетельная и содержительная всех Божия мудросте и сило, непреклонну, недвижиму Церковь утверди, Христе, Един бо еси Свят, во святых почиваяй.

4. Речи пророков и гадания воплощение проявиша от Девы Твое, Христе, сияние блистания Твоего, во свет языков изыдет, и возгласит Тебе бездна с веселием: силе Твоей слава, Человеколюбче.

5. Божию и неизреченную доброту добродетелей Твоих, Христе, исповем: от Присносущныя бо Славы, Соприсносущное и Ипостасное возсиявый Сияние, из девственныя утробы, сущим во тьме и сени воплощься, возсиял еси Солнце.

6. Морский пучинородный китов внутренний огнь, тридневнаго Твоего прогребения проображение, егоже Иона пророк показася. Спасен бо, яко и предпослася, неврежден, вопияше: пожру Ти со гласом хваления, Господи.

7. Безстудней ярости же и огню Божественное желание сопротивляяся, огнь убо орошаше, ярости же смеяшеся, Богодохновенною словесною преподобных тривещанною цевницею противовещая мусикийским органом посреде пламене: препрославленный отцев и наш Боже, благословен еси.

8. Пламень орошающ преподобныя, злочестивыя же попаляющ, Ангел Божий всемощный показа отроком, живоначальный же источник содела Богородицу тлю смерти и живот точащу поющим: Содетеля единаго поим избавлении, и превозносим во вся веки.

Припевы Праздника:

1. Ангели, успение Пречистыя видевше, удивишася, како Дева восходит от земли на Небо.

2. Величай, душе моя, от земли на небо, честное преставление Божия Матере.

9. Побеждаются естества уставы в Тебе, Дево Чистая, девствует бо рождество и живот предобручает смерть: по рождестве Дева и по смерти жива, спасаеши присно, Богородице, наследие Твое.

1. Грядите людие, поим песнь Христу Богу, раздельшему море и наставльшему люди, яже изведе из работы египетския, яко прославися.

3. Утверди нас в Тебе, Господи, Древом умерщвлей грех, и страх Твой всади в сердца нас, поющих Тя.

4. Услышах, Господи, слух Твоего смотрения, и прославих Тя, Едине Человеколюбче.

5. Сеннописанный мрак гаданий разорив, и верных прибытием истины, Богоотроковицею, озарив сердца, и нас светом Твоим, Христе, настави.

6. Ко Господу от кита Иона возопи: Ты мя возведи из глубины ада, молюся, да яко Избавителю, во гласе хваления, истины же духом пожру Тебе.

7. Купина в горе огнеопальная и росоносная пещь халдейская, яве предписа Тя, Богоневесто, Божествен-ный бо невещественный в вещественнем чреве, Огнь неопально прияла еси. Темже из Тебе Рождшемуся поем: благословен еси, Боже отец наших.

8. В пещи отрочестей прообразил еси иногда Твою Матерь, Господи, образ же Сия из огня изымаше, неопально входящия, Юже поем, явльшуюся Тобою концем днесь, и превозносим во вся веки.

Припевы Праздника:

1. Величай, душе моя, преславное рождество Божия Матере.

2. Величай, душе моя, от неплодове рождшуюся Деву Марию.

9. Яже прежде Солнца Светильника Бога возсиявшаго, плотски к нам пришедшаго, из боку Девичу неизре-ченно воплотившая, Благословенная Всечистая, Тя Богородице, величаем.





База данных защищена авторским правом ©uverenniy.ru 2016
обратиться к администрации

    Главная страница