6 класс Сеелеська



Скачать 127.76 Kb.
Дата11.07.2016
Размер127.76 Kb.
6 класс
Сеелеська

А евтави, кодамо мазый сексень виресь! Чувтотне - теке палыця штатолт. Ков а варштат – пертьпельксэсь ожо. Модаськак весе вельтязь, прок сырнень, каштордыця лопасо. Сееленть эзь кирде седеезэ, теле лангс матедевемадо икеле лиссь ушов ды ваннось мазый лопатнень лангс. Зярдо сон сыргози, ушосонть уш карми улеме тундо. Се шкантень моданть лангсо мазый лопатне чополгадыть.

Сеелесь весть-кавксть ютась кудонзо перька. Варштызе: вадрясто ли сон теезь. Кудозо ульнесь вармасо правтозь эчке чувто ало. Сон домка ды лембе. Ацавксозо ягода тикшень. Зярыя ягодынеть нетькснэк-мезнек кармить дильнеме удыцянть велькссэ. Ансяк сыргозят, на вана теть: ягодат ваныть лангозот.

А мезть кортамс: кудонзо-чинзэ телентень анокстазь вадрясто. Нама, кизна эзь саво тевтеме лужалемс. (101)

Т. Тимохина
Ине сёрмадыця
Кузьма Григорьевич Абрамов. Те лементь Мордовиясо содасызь весе, ды аволь ансяк минек республикасо, васоло сонзэ томбалеяк.

Сон, васняяк, эсь романсонзо, комедиясонзо истя кемевиксстэ, виевстэ невтизе эрзятнень ды минек ёнкссо эриця лия раськетнень эрямост меельце зярыя пингетнесэ. Аволизе тее тень Кузьма Григорьевич, паряк, течимс аволинек сода, кие ульнесь Пургаз, Боляень Акай. А истямо мельспаро печтявлинек Степан Эрьзянь кувалмаяк.

К.Г. Абрамовонь пельде тонавтнить одтнэяк. Кузьма Григорьевич ламо тейсь эрзянь келенть ванстоманзо ды ванськавтоманзо коряс. А стяко тензэ ёвтыть сюкпря весе, кить вечкить тиринь келенек. Зняро ды кодат романт сёрмадсь Абрамов, истят маласо иетнестэ киненьгак а сёрмадовить. Теде кавтолдомскак а савкшны. Те алкуксонь романт, конатнень ловномсто талнат ды кенярдат, витят седееть. (110)

Н. Ишуткинэнь коряс


Нармунень рай
«Косо Равось пры иневедьс, тосо нармунень рай». Вантака, валмеревксэсь морокс велявтсь. Алкукскак, уят Равонть дельтава, а тесэ сэрей пильге нармунть: локсейть, пеликант, мацейть, яксяргот, баклант, транзейть, ашо пуло куцькант, каравайкат. Меельцетне, келя, мамонтонь пингень.

Зярдо тень несак телевизорсо – те вейке тев, а вана зярдо сынь сельметь икеле аштить – мартост тонськак ливтявлить. Вана минек икелев озасть локсейть. Левксэст марто. Левкстнэ апокшт, а уш сёлмосост ахолить…Тюсост чоподат, нерест пштить, кирьгаст кувакат.

А вана баклантнэ. Сынь, егеренек валонзо коряс, озсить…лия нармунь лангс. Толгаст а начтомка, ёжовт!

А вана лысухатне сёксь малав истя куявгалить – лангсост ашо пуло куцькантнэ велякшныть. Лисни, нармунтне нармунть калгить… (107)

В. Лобановонь коряс
Пси чи
Чись валскестэ чокшнес валсь эсензэ псинзэ, апак жаля костясь моданть, кармавтсь экше таркань вешнеме, конань а шождыне ульнесь муемс. Вирьсэнтькак лопатне васня кармасть пужомо, мейле каявсть лангозост мездеяк а пештевиця певтеме сукст ды эрьва кодат зыянов унжат. Нармунтнень виест эзь сато сынст каршо бороцямо, ды виресь сельме икеле кармась пиже палянзо каямо, таркань-таркань овсе раужкадсь. Стака ваномс богатырь-тумотнень лангс, конат нолдасть голой тарадост пачка, прок мейсэяк а кирдевиця кинжал, весень пултыця сурбунатнень. Весемезэ колмо недлят пиземевтеме, но вана уш а мейсэ лексемс, паксянь китнень ды велень ульцятнень велькссэ аштесть пулень тусто пельть, вишка лисьминетне кармасть коськеме, аламолгадсь ведесь лейтнесэяк. (101)

А. Щеглов




Тундонь чистэ
Седе валдосто ды валдосто валдомтсь чись келей паксятнень ды виртнень. Раужкадсть паксява рудазов китне, сэньшкадсь лейсэ эчке эесь. Састь ашо нерь грацтне, эрязкадыть витнеме ташто пизэст. Шалнозевсть бойка чудикерькстнэ.

Лиссь чопода виренть чирес ашо нумолнэсь, кузсь менчевезь коряга лангс. Стявтынзе покш пилензэ ды ванны. Ванны: лиссь виренть чирес мазый сярдо, лоткась ды кунсолы.

Чаво вирьсэ ава овтось ливтинзе пизэстэнзэ вишкине левкскензэ ды саинзе виренть чирес, жольниця чудикерькстнэнь ваксс налксеме.

Кавтонь-кавтонь ливтясть лембе масторсто вирень мацейтне, састь васенце карготне.

Вирьсэ, козонь седее ламо понги лембе чинть эйстэ, нолдынзе эсь лепе пухонь кондямо пилекстнэнь калесь. Сэрей чувтотнень ало ацавсть сэнь подснежниктне. (100)

И. Соколов-Микитов


Сёксь
Лопатне певерсть. Чувтотне штапот, неявить чурокс. Виресь сэтьме, чаво. Ансяк бути лиясто косояк варнозеви алонь салы варака или тернезеви кувака пуло сезьган. Празь лопатне ожо чов ладсо вельтизь вирень янонть. Те янонть Канаев содасы умок. Сон а весть чийнесь тия вишкинестэ, зярдо покштязо ванстсь Салдинэнь нешкепиренть. Нешкепиресь сеске жо. Кода сон лиякстомсь! Сестэ покшоль, валдоль. Ве пестэ омбоце пес пешксель якстере нешкеде. Ней сон неяви чавокс. Кемень нешкетне, конат путозь полянанть куншкас, аштить теке кадозь кудынеть. Мекштне а ливтнить. Гостя атя панжизе землянканть, ладсесь кияксонтень жердят. Мейле керясь кавто кувака палкат, куншка видезэст кавтонь тарка сюлмась пикст. Неть палкатне эрявить нешкень кандтнемс. (104)

К. Абрамовонь коряс


Коське тундо
Те иень тундось коськель, псиль ды вармаволь. Пиземетне эзть начто модамештенть. Чувто лопатне ансяк пурнызь виест, кармасть румомо, пиже касовкстнэ, конат вельтякшнызь лайметнень, паксятнень ды весе чаво таркатнень, ожолгадсть ды каштордсть коське варманть ало. Сэнь менелесь эзь полавтне тюсонзо валскестэ чокшнес, сонзэ чамазо ваньксэль, пель панкске арасель косояк. Менеленть сэрезэ марявсь седеяк певтемекс, а изнявиця виекс, конань лангсо чись налксесь кода мелезэ, сулейгак малазонзо эзь нолда.

Шкась кодамояк вийнень а лоткавтови: лиси-валги чись, эсь молевтьсэ валдонть полавтсы чопода, читне, недляс керьксавозь, велявтыть ковс, конат, прок покш эскелькст, пурнавить вейс ды тешкстасызь иенть касома поранзо. Истя ульнесь коське иестэнтькак: тундось тусь пингень кандомо, тарказонзо азорокс арась кизэсь. (107)

В. Горбуновонь коряс
Лезэв вастовомат
Эрьва чинь тевензэ-валонзо ламочист кувалма Ларянь инжекс якамс шказо арасель. Ялатеке сон совсиль содавикс музыкантонтень кортнеме, мезесь кандсь седейзэнзэ лембе ды паро мельть-превть. Самай те кудосонть сон кармась чарькодеме, кода эрьва морыцясь, ды весемесь, мезесь моли сценанть лангсо, сюлмавозь оркестранть марто, ды дирижёронь палкинесь вети весе морыцятнень, весемень вейсэнди оперань смустенть панжоманзо туртов. Самай тесэнь кортамотне Ларянь кеместэ ды пингезэнзэ сюлмизь эрзямокшонь ды лия кельсэ кортыця ломантнень морост марто. Ларя оштё васень иестэ консерваториясо тонавтнемстэ кармась пурнамо эрзямокшонь морот ды сёрмадомо мелодияст нотас. Ипполитов-Иванов тонавтызе, кода теевить ды сёрмадовить од мелодиятне. Теде мейле Ларя эстензэ кармась таштамо мельстуиця мелодият. Ламонь таркава неть вастовоматне кандсть покш лезэ. (109)

В. Горбуновонь коряс


Велень кудо
Цёрась азораванть марто совась кудос. Покш валдо кудось явозель кавтов тессто теезь пирявкссо. Седе вишка пелькссэнть – каштом марто морга . Вить вальмасонть неяви кенерезь вишня марто тарад, седе товоло – шабра кудонь стенась. Вальманть икелев аравтозь ярсамонь а покш стольне, кона вельтязь цецяв клеенкасо. Кенкшенть маласо чавозь лавцине, алонзо путозь нурька эзем ды ведь марто ведра. Тесэ жо эскес поводезь эмалировазь кружка. Горницяв совамо тарканть кекшсть ситцань шаршавтнэ. Шаршавт истямо жо материясто понгавтозельть лавциненть ды каштом кургонть лангсо.

Чувтонь киякстнэ кудосонть ваньксстэ шлязь, ды эйстэст каяты перть пельга экше кошт. Весемесь ладс пурназь, понгавтнезь ды аравтнезь эсест таркава – те невтсь, азоравась аволь целак, паряк, икелепелев уш анокстась вастомантеньгак. (106)

Г. Пинясовонь коряс
Сад пире
Июлень лембе опаня ве. Сон валдо, но пек васов а неят. Васолкстнэ ков валдосонть буто соласть. Перька коштось весе цимболды ды вандолды, масторонть лангс прок тол валовсь. Паксянть трокс кись марявсь сиянь чудикерьксэкс.

- Ах, Алеша, мон зярдояк истямо ве эзинь некшне, - мери Андрейка.

Садось кармась неявомо ещё васолдо, сон марявсь пиземе пелекс. Пачкодсть садонть ваксс. Садось эрьва ёндо ульнесь кеместэ пирязь. Пирявтонть кувалт кассть акацият ды укштор чувтот.

Кода пачкодсть овсе пирявтонть ваксс, прок ваязь ваясть чувтотнень эйстэ молиця сулеенть потс. Пирявтонть трокс сынь кузсть сеске жо, васня Андрейка, мельганзо Алешка. Ютасть пирявтонть кувалт касыця чувтотнень юткова садонтень. Кияк а неяви. Умарь чувтнэ чатьмонить, прок удыть, или киньгак учить… (104)

Н. Эркаень коряс
Виев варма
Вармась увнось прянь - полдань синдезь, лувозояк а саеви, косто пуви. Велязь-чаразь эртеви ловонь шушмотнес, каподи зяро мелезэ лов ды понжавты эйсэнзэ ков понгсь. Кить-янт а неявить, велень кудот-кардазт сэрьс вельтявсть ловсо. Веленть пельде кискань онгомаяк а маряви, ансяк аламодо кайсети церьковань покш баяганть гайтезэ. Сестэ ульнесь истямо кой: виев берянь шкасто эли пек якшамо чистэ чоп ды веньберть чавсть баягат. Понги ломань паксяс – а ёмавтсы кинзэ, превензэ чополгадыть – алашась усксы. Вармась седеяк вешксь ды увнось, мерят, бажась ськамонзо улемс мастор лангонь азорокс. Ларя стакасто эскелясь лов шушмованть, лиясто карксамо видьс ваиль ды прок уезь лисиль ловонть потсто. Вейке шушмосто лисеви, омбоцес ваи. (106)

В. Горбуновонь коряс



Теле
Телень нурька читне ютасть вейке омбоце мельга. Сынь ульнесть потмурат ды якшамот. Алга ютыця чись ансяк косто-косто варштыль шержей пельтнень экшстэ ды таго кекшелизе валдонзо. Ожназа манеезэ нолаштозь ладсо ютыль ловов бугортнэнь прява, тусто лекшсэ вельтязь вирь чувтотнень текшкева ды аламос кирвастилинзе сырнень цитнемасо.

Мейле сынь таго чополгадыльть, ды вельксэзэст новолиль шержев чекарь. Чопода ёнов менелесь ванськады, стака потмура пельтне туить Сурань томбалень сэнеждиця пандотнень экшев, ды сестэ менелень домка потмакссонть цитниця сяткинекс кирвазить тештетне. Сэтьместэ валыть сынь эсест кельме валдост ловсо копачазь модантень. Ветнеяк седеяк якшамот, што цятордыть уголтнэ ды лазновить чувтотне. (103)

К. Абрамовонь коряс


Лёмзеркс


Содазь: тундось пурны вий аволь нейке . Но чистэ чис виевгадыть пиже лисевкстнэ, живойгадыть, видемить, венстявить чинтень. Апреленть ушодовомсто пижелгадсь нардикшесь, пургондасть кальтне, лёмзёркстнэ ды сиренесь, вельтявсть одавань тюжа цветсэ лей чиретне.

Кавто-колмо чиде мейле пряст невтьсызь вишкине лопинетне килей тарадтнэнь лангсо, карми лопиямо чувтось, а вирьсэ панжить лов алдонь цецятне.

Кода бойкасто эскели тундось! Буто ансяк исяк ульнесть кельме чить, ковонть пес молемс пижелгадсь весе пертьпельксэсь. Ещё маеськак эзь са, а моданть лангсо весемесь истямо пиже, истямо пиже!

Лёмзёрксось панжи.

Кувака тарадтнэ нурьгить тротуартнэнь велькска ды, мерят, эрьванть сайсть мель каземс тундонь цецяв уцяскасо. Ды свал кирдьсак мельсэ: лёмзёркс панжи! Ды мерят: вана и ушодовсь алкуксонь тундось. (103)

Ю. Кузнецовонь коряс
Тундонь налксемат

Васенцекс ловтомо тарканть куншкас лиссь аволь покш, кувака пиле нумолнэ. Сонзэ мельга, тей-тов кирнявтнезь, ардсь омбоце нумолкаесь ды икельце нурькине пильгинетнесэ тохмадизе вишкине нумолнэнть. Тона прась кутьмерензэ лангс ды, теке ловонь покольне, кеверсь минек икелев. Вишкине нумолнэсь тунь эзь талакадо, ды теке кияк сонзэ эзизе правто – озась лов шушмонть лангс. Аламо шкань ютазь те налксицясь ношкстась солавксонть тона пев, косо аштесть ламо нумолот. Сынь учость, зярдо кияк тердьсынзе налксеме.

Вишкинесь лоткась сех покшонть икелев ды лябизе келей мештензэ. Сонсь ношкстась ды кеверсь минек икелев. Покш нумолось теке пицевсь ды, пижнезь, каявсь вишкиненть мельга.

Вишкинесь таго яходсь лапасонзо ды риштизе покшонть пиле юрга. (103)

Ч. Журавлевонь коряс
Телень самось
Ловось прась ноябрянь куншкане. Теде икеле ниле-вете чить ушось лембель: пизесь чова пиземе валскестэ чокшнес, налкставтозь, певтеме, буто менелесь почкодсь. Мейле тусь чавка пряшка начко лов, кодамо эрси ансяк тунда. Ки ланга каворькстнэ соласть, модась вецакадсь, лов марто човорязь рудазось педясь чарытнес. Веть Суранть томбальде пувазевсь кежей якшамо варма, сеске кельмевтизе, модась прок кшникс теевсь, мик гайгсь пильгало.

Валске марто Иван Иванович абунгадсь: кудосонть валдоль, кода а эрсекшни позда сёксня, - буто кияк кундызе покш зеркалас сёксень весе валдонть ды совавтызе Оха бабань кудос.

Варштась вальмава. Модась вельтязель ашосо, прок мацеень стада удось вальмало. Тополенть лангс буто каясть пондакш ашо шапка. Тарад петне утявсть алов. (104)

М. Бебанонь коряс



Вирьсэ
Артамонов мольсь апак капша. Сон ульнесь од, комськавксовошка иесэ, ансяк лангс ваномс макснесть тензэ седе ламо. Коськана чамазо ловтаняль, куш эрьва чистэ сонензэ савкшнось улемс ушосо. Конязо черькстнезь сормсевкссэ. Сельметне вансть пштистэ ды аламодо кежейстэ, сынь невтсть цёранть аламодо нусманякс. Паряк, тень коряскак Артамонов ульнесь седейспедиця ломань.

Аволь сэрей пиче тарад лангсо урнэсь ванськавтсь шуля; вешкеманть марязь, канкстомсь тандадозь вансь ломаненть мельга. Зярдо Артамонов пачкодсь овсе малас, урнэсь кирнявтсь маласо тарадс, мейле аволь васоло пиченть лангс, мейле седе тов… Урнэсь сеске ёматотсь сельме икельде, ансяк прыця эйзюронь гайгемань коряс чарькодевсь: ков ношкстась понав киринесь. Артамоновнень те эль марявиця гайгемась вечкевсь, кенярдовтсь: курок сы тундо. (104)

М. Кяшкинэнь коряс
Чадыведь
Леенть ёндо марявить ломанень пижнемат. Весе сынь мезде-бути пижнесть леенть тона ёнов, косо аштесть кавто ломанть, ды эзть сода, што сэдесь калавтнезь.

Вейкесь эйстэст аштесь овсе лей берексонть кувака палка марто ды арсесь ютамс те ёнов. Сон пштистэ вансь ютыця эйтнень мельга. Лиясто пек стака эйтне зярыя шкас лоткить сэдень перекладинанть икелев ды теить эень сэдь. Кувать апак арсе, палка марто ломанесь кирнявтсь васенце эенть лангс. Тонась прок текень учоськак. Сонзэ кепедевсь нерезэ ды нузякссто тусь чочконть трокс. Палка марто ломанесь апак тално бороцясь эйтнень марто. Зярдо пильгензэ алдо тусь васенце эесь, сон кирнявтсь омбоцентень, мейле колмоценть лангс ды лиссь ломантнень ваксс. (103)

А. Щегловонь коряс
Горлицат

У-у! У-у! – сеери чувто прясто нармунь. Те – горлица. Сон теке гулька, ансяк аламодо седе вишкине ды кирьгазо прок раужо эрьгесэ керьксазь. Бути гулькатне ливтнить ламонест – стаясо, горлицятне эрить кавтонь-кавтонь.

Кудонок икеле касы сэрей – рацяня тумонь кондямо – грецкой пеште чувто. Прясонзо ве тарад лангсо тельняяк, кизнаяк шкаст печтить кавто горлицат. Пштидить вейс ды апак лотксе ванськавтыть толгаст.

Ливтнить ансяк кавонест. Кадсы тарканзо вейкесь, омбоцеськак сырги мельганзо. Сыть, таго мерят: у-у! у-у!

Минденек а пелить. Ансяк лисят саразонь андомо, ванат, сыньгак уш валгсть. Теке азорт совить очкинентень. Саразтнэненьгак теевсть ялгакс, ансяк, паряк, кодаяк а чарькодить, мекс тонат сынст ладсо а кепсевить менелентень. (106)

В. Араповонь коряс



Эрзятнень эрямонь обуцяст

Кезэрень шкатнева эрзянь раськесь эрясь вирьга. Виртне сыненст максокшность ярсамопель, кудонь-кардазонь тейнемс чочкот; виресь ванстылинзе ятонь каявомадо.

А стяко мастор ланга мольсь кулясь: эрзятне – вирьсэ эриця ломанть. Секс эрзянь цератне вадрясто содылизь виренть обуцянзо ды маштсть превейстэ ютавтомо эрямос сонзэ лезэвчинзэ. Эряви чувтосто тейнесть кеме кедьёнкст: сянгот, налт, цётмарт, сялгот; анокстасть истя жо сокат, коцтонь кодамо стант, сурень штердема штереть-пакарть, эрямо парть, салдырькст, мазылгадсть кудо конят ды вальмачирькеть, тейнесть эйкакшост туртов налкшкеть.

Ульнесть эрзятнень эсест пазост: Инешкипаз, конань лемензэ нейгак ледстнить сыре ломантне, ансяк мерить тензэ Нишкепаз, Веречипаз; ульнесь эрзянь масторонь кирдиця масторпаз – Масторава, паксянь, сюронь паз – Норовава, ульнесть Виряват, Ведяват. (104)

Н. Мастин
Найманось эри
Найманось сыргозсь. Сон, прок мезе-бути покш ды живой, кармась кортамо, рангомо, чикордомо, панжтнеме ды пекстнеме ортанзо, кенкшензэ; котнозевсть саразт, паразевсть скалт ды реветь, калдордозевсть крандазт. Пакся луга ёндо састь лишме марто тоск удыцятне – каятотсь лишмень цяхамо, ардома. Ды весе те вейсэ саезь ульнесь Найманось.

Ашо лисьма велькссэ тумотне ды пекшетне эчкеть, сэрейть. Сынь аштить, теке шержев атят, аштить – а лыкитькак. Ансяк варма шкасто сорновтсызь тарадост, шалновтсызь лопаст.

Вень чоподанть лазызе сэденть вакссто нолдазь ракета. Сон валдо налтокс кузсь верев, аламос нурьгсь коштсонть ды прыця тештекс новольсь алов. Эйстэнзэ эрьва пелев ливтясть ожо-цитниця сяткот, мельганзо ашо пулокс кадовсь цють неявиця качамо. (102)

К. Абрамовонь коряс



Ичалка веле
Ицяло велесь, кода мерить сондензэ тесэнь эрицятне, пек умонь. Сон тезэнь теевсь сеть шкатнестэ, зярдо неть таркатнесэ рузтнэ, эрзятне, мокшотне лия народтнэнь марто вейсэ бороцясть ногаецтнэнь каршо. Зярс тюрсть башка-башка эрзянь ды мокшонь инязортнэ - Тюштя, Пургас, Пурейша, ськамост мезеяк эзть тее виев хантнэнь каршо. Зярдо мокшэрзянь народось тусь велув рузтнэнь ды лия народтнэнь марто, сестэ ногаецтнэнень сась пе.

1552 иень кизна неть таркатнева ютась войсканзо марто рузонь инязорось Иван Грозной. Ине пурьгинекс мольсь сон чилисема ёнов, кодамояк вийнень эзь кирдеве. Весе народтнэ, конат эрясть неть таркатнесэ, пурнавсть сонзэ перька ногаецтнэнь каршо бороцямо.

Эрзятнень прявтост ульнесь Ицял атя, покш ды виев ломань. Сонзэ лементь максызь одов теезь велентень.(108)

«Легендат ды преданият»


Тундонь зоря
Ушолксось экшель. Менелесь ней ульнесь ванькс ды цитнесь тештесэнзэ. Виресь каштмольсь. Ансяк косо-бути васоло, пирявксонть томбале, шольнесь чудикерькске. Экшеденть Захар совась сенека пирентень, лишменть ваксс. Лишмень лембеденть сонензэ тунь эзь маряво вень якшамось. Сон мик аламос сутямкшнось. Тундонь весь аволь кувака. А кенери мадеме чокшнень зорясь, кода уш кирвази чилисемась. Виресь сыргозсь аламонь-аламонь: васня каявсь ве нармунень вайгель, мейле омбоцень, шкань ютазь, косо-бути васоло варнозевсь варака, тернезевсь сезьган, ды виренть пиже потмозо пешкедсь прок горниповонь чольнемасо. Нешкепирень полянанть велькссэ бизнэзевсь васень мекштне, пельс лопиязь тарадтнэнь пева цитнезевсть пиземе петнявкстнэ. Сэрей чувтотнень текшкесэ зорянь кумаць валдось полавтовсь сырнень паломасо. (106)

К. Абрамовонь коряс


Маней сёксь
Умок уш прядовсть паксянь весе роботатне, сёксесь яла мезе-бути учни, а нусмакавтни читнень, а нолды чаво паксятнева азгондеме тарьксэв варматнень. Ульцятнева, прок лияназонь сэльгеть, стамбарнэ уить шанжавонь коцтт. Ламот чувтотне каизь уш лангстост пиже оршамкаст, килейтне лавтовгаст ёртсть кумацекс палыця пацят, мерят истя наряжазь лиссть теленть вастомо.

Сёксень истямо шкасто вадря якамс вирьга. Лиясто вастат чувтотнень прява толгелекс кивчкаиця ур, лиясто мерят шекшатат. Сеельтнеяк вастневить аволь чуросто. Сетне мелявтозь анокстыть телентень, салмуксост прясо кандыть пизэзэст коське лопат, лиясто – киремезь коське пангот. Понгонить тандадозь нумолкайтькак.

Молят истямо вирьганть, сон весе кувтелды икелеть эрьва кодамо тюссонзо, пильгеть ало каштордыть коське лопат, лиясто – киремезь коське пангот. Понгонить тандадозь нумолкайтькак.

Молят истямо вирьганть, сон весе кувтёлды икелеть эрьва кодамо тюссонзо, пильгеть ало каштордыть коське лопат, чевте мазый кумбокс ацавсть сынь чувтотнень алга. (107)



А. Мартынов
Каталог: files -> File -> mordva
mordva -> -


Поделитесь с Вашими друзьями:


База данных защищена авторским правом ©uverenniy.ru 2019
обратиться к администрации

    Главная страница